Azərbaycanda intermodal konteyner
daşımaları üzrə lider

Ön Söz Onlayn Servis

Bakıda “BreakBulk Caspıan”- Nəqliyyat, Tranzit və Logistika üzrə 1-ci Beynəlxalq konfrans keçirilib. Konfransda 20-ə yaxın ölkədən nümayəndə iştirak edib. Tədbirdə  Qafqaz, Xəzər və Mərkəzi Asiya regionunda daha möhkəm işgüzar əlaqələrin qurulmasında maraqlı olan aparıcı  yükdaşıma şirkətləri, ekspeditor, liman və terminalların nümayəndələri bir araya gəliblər. Azərbaycanda nəqliyyat infrastrukturunun inkişafı, ölkəmizin beynəlxalq nəqliyyat dəhlizlərinin əlaqələndirilməsində  regional nəqliyyat-logistika mərkəzi kimi rolu diqqət mərkəzində olub. Tədbirdə “Azərbaycan Dəmir Yolları” QSC-nin törəmə şirkəti olan  “ADY Konteyner” MMC-nin nümayəndələri də iştirak ediblər. Şirkətin əməkdaşı Cavid Həbibov  çıxış edərək, dəmir yolu ilə yük daşımalarında Azərbaycanın tranzit imkanları barədə tədbir iştirakçılarına məlumat verib. Azərbaycandan keçən nəqliyyat dəhlizləri, “Azərbaycan Dəmir Yolları” QSC-nin imkanları  və həyata keçirilən infrastruktur layihələri barədə danışıb.

SOCAR-ın Marketinq və İqtisadi Əməliyyatlar İdarəsi “Azərbaycan Dəmir Yolları” QSC-nin törəmə şirkəti olan “ADY Konteyner” ilə birgə karbamidin Türkmənistanın Marı zavodundan Türkiyəyə çatdırılması üzrə ilk sınaq alışını və nəqlini həyata keçirib. Nəql Ələt beynəlxalq dəniz limanında  yüklərin vaqonlardan konteynerlərə yenidən yüklənməsi yolu ilə reallaşdırılıb. Ardından yüklənmiş konteynerlər Bakı-Tbilisi-Qars dəmir yolu xətti vasitəsilə üç müxtəlif istiqamətdə Türkiyəyə göndərilib və müvəffəqiyyətlə son alıcıya çatdırılıb.

Bu konteyner daşımalarının həyata keçirilməsi layihəyə qatılan ölkələrin logistik imkanlarını, layihəyə Mərkəzi Asiya regionunun ölkələrinin, o cümlədən Türkmənistanın cəlb olunduğunu, eləcə də konteyner daşımalarından istifadənin üstünlüyünü bir daha nümayiş etdirib.

Gələcəkdə nəqliyyat xərclərinə qənaət edilməsi və Azərbaycan karbamidinin dünyanın hər yerinə “qapıdan qapıya” xidməti ilə çatdırılması məqsədilə “SOCAR Carbamide” şirkətinin karbamidini də nəql etmək planlaşdırılır.

Qeyd edək ki, Bakı-Tbilisi-Qars dəmir yolu xəttinin açılışı 2017-ci il oktyabrın 30-da həyata keçirilib.

Bakı-Tbilisi-Qars dəmir yolu xətti Azərbaycan-Gürcüstan-Türkiyə hökumətlərarası saziş əsasında tikilib. İlkin mərhələdə yük daşımalarının həcmi illik 6,5 milyon ton səviyyəsində olacaq, eləcə də bir milyona qədər sərnişin daşınacaq.

 

 

Hindistanın paytaxtı Nyu – Delhidə “Şimal-Cənub” Beynəlxalq Nəqliyyat Dəhlizinin uğurlu inkişafı” mövzusunda beynəlxalq seminar-təqdimat  keçirilir. Rusiyanın Nəqliyyat nazirliyinin təşkilatçılığı ilə baş tutan tədbirdə Azrbaycan, Hindistan, İran, Rusiya,  Belorusun nəqliyyat-logistik şirkətlərinin, dövlət orqanlarının  nümayəndələri  iştirak edirlər.

Ölkəmizi tədbirdə “Azərbaycan Dəmir Yolları” QSC-nin törəmə şirkətləri olan “ADY Konteyner” MMC və “ADY Express” MMC təmsil edir. “ADY Konteyner” MMC-nin əməkdaşı Cavid Həbibov seminarda “Şimal-Cənub” Beynəlxalq Nəqliyyat Dəhlizinin inkişafında  Azərbaycanın rolu  mövzusunda çıxış edib. O, çıxışında beynəlxalq nəqliyyat dəhlizinin logistik imkanları barədə geniş məlumat verib. Azərbaycanın “Şimal-Cənub” Beynəlxalq Nəqliyyat Dəhlizinin inkişaf etdirilməsi istiqamətində gördüyü işlərdən danışıb.

Almaniyanın paytaxtı Berlində “İnnoTrans-2018” Dəmir yolu nəqliyyatı və inovasiyaları sərgisi keçirilir. 18-21 sentyabr tarixlərində keçirilən Avropanın ən iri dəmir yolu nəqliyyatı sərgisinin işində  “ADY Konteyner” MMC –nin əməkdaşları da iştirak edir. Tədbirdə 70-dən artıq ölkədən 3000-dən artıq şirkət təmsilçisi dəmir yolu nəqliyyatlı sahəsində tətbiq edilən yeni texnologiyalar, daşıma mexanizmləri, dəmir yolu infrastrukturu, tikinti və yeni logistika istiqamətlərini təqdim edirlər.

“Azərbaycan Dəmir Yolları” QSC, “ADY Konteyner” və  “ADY Express”  şirkətləri, birgə təmsil olunduqları stenddə ilk növbədə Azərbaycanın nəqliyyat sahəsində əldə etdiyi uğurlar, ölkəmizin tranzit potensialı və yeni layihələr haqqında məlumatlarla bölüşüblər. Azərbaycan təmsilçiləri Bakı-Tbilisi-Qars, Astara-Astara kimi dəmir yolu layihələri, Avropa-Qafqaz-Asiya, Şimal-Cənub və Cənub-Qərb Beynəlxalq Nəqliyyat Dəhlizləri haqqında sərgi iştirakçılarına geniş məlumatlar təqdim edərək, yük sahibləri və loqistika sahəsində fəaliyyət göstərən iri alman və beynəlxalq şirkətlərlə danışıqlar aparıblar.

Bununla yanaşı, ADY Konteyner MMC-nin əməkdaşları, sərgi iştirakçılarına  şirkətin fəaliyyəti, Azərbaycanın iştirak etdiyi Beynəlxalq Nəqliyyat Marşrutlarında həyata keçirdiyi yükdaşımalar, ölkəmizdə konteynerləşdirmə üzrə institusional və infrastruktur islahatları barədə ətraflı məlumat veriblər.

Qeyd edək ki, 200 min kvadrat metrə sahədə yerləşən 50-ə yaxın pavilyonda bütün qitələri  – Asiyadan tutmuş Şimali və Cənubi Amerikaya qədər ölkələri təmsil edən şirkətlər arasında, Azərbaycan dəmiryolçularının stendinə diqqət olduqca böyükdür. Azərbaycanda  dəmir yolunun inkişafı, beynəlxalq daşımalar sahəsində əldə edilən nailiyyətlər və həyata keçirilən irimiqyaslı layihələr sərgi iştirakçıları tərəfindən maraqla qarşılanır.

 

Sentyabrın 18-də, İsveçrənin Sürix şəhərində, İsveçrə-Çin Birgə Ticarət Palatasının və Azərbaycanın İsveçrədəki səfirliyinin təşkilatçılığı ilə III “Yeni İpək Yolu” forumu keçirilib. Forum   “Çinin “Bir kəmər, bir yol” təşəbbüsü: Rusiya, Mərkəzi Asiya və Cənubi Qafqaz vasitəsilə  Çinlə  Avropa arasında infrastruktur, energi və ticarət əlaqələrinin yaradılması” mövzusunda baş tutub. Tədbirdə ölkəmizi “Azərbaycan Dəmir Yolları” QSC-nin törəmə şirkəti olan “ADY Konteyner” MMC-nin direktoru Natiq Cəfərov təmsil edib. Natiq Cəfərov “Bakı-Tbilisi-Qars Dəmir yolu və Bakı Beynəlxalq Dəniz Ticarət Limanı: Şərqlə Qərbi birləşdirən layihələr ” mövzusunda çıxışında Azərbaycan iqtisadiyyatının şaxələndirilməsində və qeyri-neft sektorunun inkişafında nəqliyyat sektorunun əhəmiyyətini vurğulayıb və Azərbaycanın transregional nəqliyyat bağlantılarının daha da gücləndirilməsinə verdiyi töhfə barədə danışıb. O, Azərbaycanın həyata keçirdiyi regional layihələri və İsveçrə şirkətləri üçün yaranan biznes perspektivlərini qeyd edib, eləcə də əlverişli geostrateji mövqeyə malik olan ölkəmizdə nəqliyyat infrastrukturunun təkmilləşdirilməsi, respublikamızın tranzit potensialının reallaşdırılması, nəqliyyat dəhlizlərinin inkişafı istiqamətində görülmüş işlər barədə məlumat verib. Qeyd edilib ki, Transxəzər Şərq-Qərb ticarət və tranzit dəhlizi Çinlə Avropa arasında ən qısa marşrut olduğundan, tranzit və yükdaşıma baxımından da səmərəlidir. Şərq-Qərb nəqliyyat dəhlizinin tranzit müddəti 15 gündür. Dəhliz boyu sabitlik, təhlükəsiz daşınma, dəhliz dövlətləri arasında sıx əməkdaşlıq, müasir standartlara cavab verən infrastruktur Şərq-Qərb nəqliyyat dəhlizinin önəmini daha da artırır. Bu dəhliz Çinin “Bir kəmər – Bir yol” təşəbbüsünün mühüm komponentinə çevrilib. Natiq Cəfərov dəhliz üzrə daşımaların artırılması imkanları, marşrut boyu “bir pəncərə” sisteminin tətbiqi, regional tərəfdaşlığın gücləndirilməsi, regionda həyata keçirilən infrastruktur layihələri barədə də məlumat verib. Tədbir iştirakçılarının suallarını cavablandırıb.

is 6

 

Azərbaycan Respublikasının Prezidenti İlham Əliyev avqustun 13-də paytaxtın Qaradağ rayonunun Lökbatan qəsəbəsində inşa olunan Abşeron Logistika Mərkəzinin açılışında iştirak edib.

Dövlətimizin başçısı mərkəzin rəmzi açılışını bildirən lenti kəsdi.

Prezident İlham Əliyev Abşeron Logistika Mərkəzinin fəaliyyəti ilə tanış oldu.

Abşeron Logistika Mərkəzinin direktoru Ziya Ağayev görülən işlər barədə dövlətimizin başçısına məlumat verdi. Bildirildi ki, mərkəzin inşasına 2017-ci ilin aprelində başlanılıb. Tarixi İpək yolunun üzərində yerləşən Abşeron Logistika Mərkəzinin sutkalıq yükaşırma gücü 30 min ton təşkil edir ki, bu da ildə təqribən 11 milyon ton yükə bərabərdir. Bu mərkəz vasitəsilə Azərbaycanın kənd təsərrüfatı məhsullarının xarici ölkələrə ixracı planlaşdırılır. Abşeron Logistika Mərkəzi bütün xidmətləri təklif etməklə vaxta qənaəti və xərclərin azalmasını təmin edir.

Müəssisə ilk mərhələdə 28 hektar ərazidə dəmir yolu və avtomobil yollarının qarşılıqlı əlaqəsini təmin edərək logistika xidməti göstərməyə başlayacaq. İkinci mərhələdə isə 35 hektar ərazi üçün layihə hazırlanıb. Bu mərhələnin yekunlaşmasından sonra Logistika Mərkəzi həm Azərbaycanın, həm də Qafqazın coğrafı logistik inkişafına, həmçinin ölkəmizin iqtisadi tərəqqisinə böyük töhfə verəcək.

Mərkəz vahid gömrük məntəqəsi kimi qəbul olunub. İdxal, ixrac və tranzit gömrük əməliyyatları ərazidə yerləşən gömrük orqanları tərəfindən həyata keçirilir.

Logistik xidmət tərəfdaşlarının əməkdaşlığı məhsuldarlığı və səmərəliliyi daha da artıracaq. Mərkəzin yaradılmasında əsas məqsəd ən müasir üsullarla müştərilərin istəklərini təmin etməkdir. Bunun üçün bütün xidmətlər “vahid pəncərə” sistemi ilə bir nöqtədən təmin olunur. Müəssisədə ümumilikdə 350 nəfər işlə təmin edilib.

Vurğulandı ki, Abşeron Logistika Mərkəzində 2400 konteyner tutumu olan terminal, tutumu 21 min ton olan iriölçülü yük terminalı, 8100 kvadratmetrlik qapalı anbar sahəsi, açıq yük platforması və ən müasir texnikalar xidmət göstərəcək. Mərkəzdə yük maşınları üçün 200 yerlik park yaradılıb, dəmir yolu körpüsü və avtomobil yolları inşa edilib. Burada üçmərtəbəli gömrük, inzibati və müştəri xidmətləri binası, həmçinin giriş-çıxışa nəzarət, texniki, ictimai obyekt binaları inşa edilib.

Mərkəzdə 6-sı qatar qəbulu, 2-si konteyner, 2-si açıq yük və 2-si anbar sahələrinə boşaltma və yükləmə xətləri olmaqla, ümumilikdə 12 kilometr uzunluğunda dəmir yolu xətti var. Müəssisədə illik yükaşırma qabiliyyəti 3,5 milyon ton olan terminal vasitəsilə idxal, ixrac və tranzit yüklərin daşınması da icra olunacaq.

Abşeron Logistika Mərkəzinin əsrlər boyu mədəniyyətləri və qitələri birləşdirən tarixi İpək yolunun mərkəzində yerləşən paytaxtımızın Lökbatan qəsəbəsi ərazisində inşa edilməsi xüsusilə əhəmiyyətlidir. Mərkəzin ərazisi ticarət, logistika və sənaye zonalarının kəsişməsində və nəqliyyat şəbəkələrinin mərkəzində yerləşir. Bu müəssisənin “Meyvəli” MMC-yə, Bakı Baş Gömrük İdarəsinə, Ələtdəki Bakı Beynəlxalq Dəniz Ticarət Limanına, “Sədərək” və “Binə” ticarət mərkəzlərinə, həmçinin digər biznes strukturlarına yaxınlıqda yaradılması onun iqtisadi əhəmiyyətini daha da artırır. Təxmini hesablamalara görə, gün ərzində 750-800 yük maşını şəhər mərkəzində yerləşən stansiyalardan boşalan yükləri şəhərdaxili anbar və tikinti materialları bazarlarına daşıyır. Bu yüklərin şəhərdəki məntəqələrə, inşaat materialları mağazalarına və bazalarına çatdırılması paytaxtda nəqliyyatın hərəkətində sıxlıq və digər problemlər yaradır. Logistika Mərkəzinin yaradılması bu problemi həll etməklə yanaşı, həm də Bakının ekoloji durumunu daha da sağlamlaşdıracaq. Belə ki, Bakıətrafı dəmir yolu stansiyalarından Abşeron Logistika Mərkəzinə yönəldiləcək yüklərin həcminin 0,8 milyon ton olacağı ehtimal edilir. Beləliklə də Bakıya gələn 2 milyon ton yük şəhərdən kənarda yerləşən Abşeron Logistika Mərkəzinə yönəldiləcək. Bu da orta hesabla 125 min yük avtomobili deməkdir.

Bu mühüm infrastruktur obyektinin Bakı-Tbilisi-Qars, İran-Astara-Bakı, Rusiya-Yalama-Ələt dəmir yolu marşrutları ilə əlaqəsi var. Bakı-Tbilisi-Qars dəmir yolu tam gücü ilə fəaliyyətə başladıqdan sonra bu mərkəz vasitəsilə qonşu ölkələrlə idxal-ixrac əməliyyatlarını, eləcə də Azərbaycan ərazisindən multimodal yük daşımalarını daha çevik yerinə yetirməyə imkan yaranacaq.

Mərkəzin fəaliyyəti ilə tanış olan dövlətimizin başçısı kollektivə uğurlar arzuladı.

“ADY Konteyner” şirkəti İtaliyadan gələn yüklərin Bakı-Tbilisi-Qars dəmir yolu vasitəsilə İran və ya Mərkəzi Asiya ölkələri və Çinə nəql edilməsi üçün sınaq daşımalarına başlayır.

Bu barədə “ADY Konteyner” şirkətinin direktoru Natiq Cəfərov AZƏRTAC-a eksklüziv açıqlamasında deyib.O bildirib ki, bu yaxınlarda “İtaliya Milli Dəmir Yolları” ilə yüklərin İtaliyanın Triest və Bari limanlarından Türkiyənin Mersin limanına çatdırılaraq, oradan da Bakı-Tbilisi-Qars dəmir yolu vasitəsilə Azərbaycan ərazisindən keçərək, İran və ya Mərkəzi Asiya ölkələri və Çinə nəqli perspektivləri müzakirə olunub. Artıq bu barədə razılığa gəlinib və tezliklə bu istiqamətdə sınaq daşımalarına başlanılacaq.

 Bu gün “Azərbaycan Dəmir Yolları” QSC-nin sədri Cavid Qurbanov, Bakıda səfərdə olan “İtaliya Milli Dəmir Yolları”nın Beynəlxalq əlaqələr üzrə vitse-prezident Covanni Rokkanın başçılıq etdiyi nümayəndə heyəti ilə görüş keçirib.
Görüşdə Azərbaycan və İtaliya Dəmir Yolları arasında qarşılıqlı əməkdaşlıq məsələləri diqqət mərkəzində olub. Danışıqlarda tərəflər, Azərbaycan dəmir yollarında aparılan islahatlar, dəmir yollarının və hərəkət heyətinin yenilənməsi sayəsində yaradılan yeni imkanları, Avropa-Asiya marşrutu ilə yüklərin nəqli sahəsində Bakı-Tbilisi-Qars və Astara(Azərbaycan)-Astara(İran) dəmir yollarının üstünlüklərini nəzərdən keçirərək, Orta Asiya, İran və Çin istiqamətində potensial yükdaşımaları müzakirə ediblər. Italiyalı qonaqlar Bakı-Tbilisi-Qars dəmir yolunun Avropa üçün vacibliyini qeyd edərək, onu İtaliya və digər Avropa ölkələri üçün Azərbaycanın enerji layihələri qədər önəmli olduqlarını bildiriblər. Onların sözlərinə görə, Bakı-Tbilisi-Qars dəmir yolu 21-ci əsrdə Avropa-Asiya yükdaşımalar sistemini dəyişdirərək onu inkişaf etdirəcək və yük dövriyyəsinin artmasına səbəb olacaq.
Söhbət zamanı, yüklərin İtaliyanın Triesta və Bari limanlarından Türkiyənin Mersin limanına çatdırılaraq, oradan da Bakı-Tbilisi-Qars dəmir yolu vasitəsi ilə Azərbaycan ərazisindən keçərək, İran və ya Orta Asiya ölkələri və Çinə nəqli perspektivləri müzakirə olunub. Eyni ilə yüklərin, təklif olunan marşrutla əks istiqamətində daşınması perspektivi nəzərdən keçirilərək, onun rəqabətə davamlı olduğu bildirildi.
Bundan başqa İtaliya dəmir yollarının imkanlarından yararlanaraq, yüklərin daha sonra Fransa, Almaniya və Benelüks ölkələrinə daşınması imkanları nəzərdən keçirilib. İtaliya nümayəndə heyəti Avropa İttifaqı ilə İran, Orta Asiya və Çin arasında İdxal/İxrac əməliyyatlarına dair və potensial yük bazası haqqında məlumatları Azərbaycan tərəfinə təqdim edərək, Azərbaycan Dəmir Yolları ilə əməkdaşlıqda maraqlı olduqlarını bəyan ediblər.
Görüşün sonunda, danışıqların nəticələrinə dair, tərəflər arasında memorandum imzalanıb.

 

 

Bakıda XVII Xəzər Beynəlxalq Nəqliyyat, Tranzit və Logistika (TransCaspian/Translogistika 2018) sərgisi işinə başlayıb. Sərgi Xəzər regionunda aparıcı nəqliyyat tədbirlərindən biridir. Bu il “TransCaspian/Translogistica” sərgisində dünyanın 15 ölkəsini təmsil edən 85 şirkət iştirak edir. Sərgidə “Azərbaycan Dəmir Yolları” QSC və onun törəmə şirkətləri – “ADY Konteyner MMC və “ADY Ekspres” MMC birgə stendlə çixiş edirlər. Tədbirdə  Orta Koridor və ya Transxəzər Beynəlxalq Nəqliyyat Marşrutu, Şimal-Cənub və Cənub-Qərb Beynəlxalq Nəqliyyat Dəhlizləri, Bakı-Tbilisi-Qars və Astara(Azərbaycan)-Astara(İran) nəhəng nəqliyyat layihələri sərgi iştirakçılara təqdim edildi. Hazırda dünyada tranzit daşımalarda əsas tərəfdaş kimi qəbul edilən Azərbaycanın bu sahədəki imkanlarını nümayiş etdirən “ADY”, “ADY Express” və “ADY Container” əməkdaşları, ölkənin Avropa ilə Asiya arasında əsas əlaqələndirici məntəqəyə çevrilməsi haqda ziyarətçilərə məlumatlar çatdırıblar. Dəmir yolu daşımalarında yeni tərəfdaşlarla danışıqlar aparılaraq, yüklərin Azərbaycanın tranzit marşrutlarına cəlb olunması istiqamətində əməli tədbirlərin görülməsi məsələsi ətrafında müzakirələr aparılıb.

Qeyd edək ki, “TransCaspian/Translogistica – 2018″ sərgisi İyunun 11-13 tarixlərində, 3 gün ərzində BakuExpo mərkəzində işini davam etdirəcək.

Ukraynanın Odessa şəhərində ekspeditorların «Transport and Logistics» mövzusunda beynəlxalq forumu keçirilib. 29-30 may tarixində keçirilən forum, bu sahədə çalışan biznes nümayəndələri üçün bir platforma olaraq, mövcud problemlər və çağırışlar, xidmətlərin keyfiyyətinin yaxşılaşdırılması və kadr hazırlığı kimi məsələlərin müzakirə edilməsinə şərait yaradır.

Forumda “Azərbaycan Dəmir Yolları” QSC, “ADY Container” MMC  və “ADY Express” MMC –nin nümayəndələri də iştirak ediblər.

Tədbir çərçivəsində Azərbaycan, Gürcüstan və Ukrayna dəmir yolları nümayəndələri ilə İran və Çinin yük sahibləri arasında keçirilən görüşlərdə, Azərbaycanın təşəbbüsü ilə reallaşdırılan Cənub-Qərb Beynəlxalq Nəqliyyat Dəhlizinin və İranın Astara şəhərində, Azərbaycan Dəmir Yolları tərəfindən inşa edilən yük terminalının, eləcə də Orta Koridor – Transxəzər Beynəlxalq Nəqliyyat Dəhlizinin və Bakı-Tbilisi-Qars dəmir yolunun təqdimatı keçirilərək, dövlət və özəl sektorun nümayəndələri və beynəlxalq təşkilatlarla iqtisadi əlaqələrin möhkəmləndirilməsi məsələləri müzakirə edilib.

Azərbaycan nümayəndə heyətinin keçirdiyi ikitərəfli görüşlərdə, biznes proseslərinin təkmilləşdirilməsi, Cənub-Qərb və Orta Koridor Beynəlxalq Nəqliyyat Dəhlizi ilə həyata keçirilən yükdaşımaların tarifləri, Asiya-Avropa istiqamətində yükdaşımalar sahəsində aparıcı texnoloqiyaların tətbiqi kimi məsələlər diqqət mərkəzində olub. Azərbaycanlı ekspertlər, tədbir iştirakçıları ilə  loqistik məsələlərin həllinə dair məsləhətləşmələr apararaq, strateji tərəfdaşlarla gələcək əməkdaşlığın perspektivlərini müzakirə ediblər.

Avropa-Asiya istiqamətində yükdaşımaların inkişafına dair keçirilən yüksək səviyyəli görüşdə isə, Azərbaycanda dəmir yolu loqistikası sahəsində görülən işlər, həyata keçirilən iri infrastruktur layihələri,  Azərbaycanın nəqliyyat potensialı və ölkəmizdə nəqliyyat sektorunda görülən işlər haqqında geniş məlumat verilib.

  • 1
  • 2
  • 8

HEYDƏR ƏLİYEV

Azərbaycan xalqının ümummilli lideri

İLHAM ƏLİYEV

Azərbaycan Respublikasının Prezidenti

MEHRİBAN ƏLİYEVA

Azərbaycanın birinci xanımı

ADY

Qapalı Səhmdar Cəmiyyəti

ADY EXPRESS

Məhdud Məhsuliyyətli Cəmiyyəti

The leader in container transportation in Azerbaijan

Contacts us

info@adycontainer.com