“Bakı-Tbilisi-Qars dəmir yolu Avrasiyanın nəqliyyat xəritəsinin önəmli hissəsinə çevrilir. Bu yolun fəaliyyəti nəticəsində yol boyunca yerləşən ölkələr arasındakı ticarət dövriyyəsi ilə yanaşı, qarşılıqlı sərmayə qoyuluşu da artacaq, bu yoldan istifadə edən bütün ölkələr arasında əməkdaşlıq dərinləşəcək”.
Azərbaycan Respublikasının Prezidenti İlham Əliyevin Bakı-Tbilisi-Qars dəmir yolunun açılışı zamanı uzaqgörənliklə söylədiyi sözləri artıq reallaşmaqdadır. Belə ki, Çin Xalq Respublikasının Sian şəhərindən Avropa istiqamətdə daha bir konteyner blok qatarı yola düşüb. 42 konteynerdən ibarət qatarın təyinat məntəqəsi Çex Respublikasının paytaxtı Praqa şəhəridir.
Transxəzər Beynəlxalq Nəqliyyat Marşrutu üzrə hərəkət edən bu qatar Bakı-Tbilisi-Qars dəmir yolu xətti üzərindən keçərək Türkiyədəki Marmaray tuneli ilə dəmir yolu vasitəsilə kəsintisiz, birbaşa Avropaya hərəkət edən ilk yük qatarı olacaq. Beləliklə, Sian-Praqa marşrutu üzrə konteyner blok qatarı Bakıdan Avropaya qədər fasiləsiz olaraq yalnız dəmir yolu vasitəsilə hərəkət edəcək. İstanbul şəhərində qatarın təntənəli qarşılanma mərasiminin keçirilməsi nəzərdə tutulur.
Qatarla Çex Respublikasına Çin istehsalı olan məişət texnikası göndərilib. Yükdaşımanın operatoru Transxəzər Beynəlxalq Nəqliyyat Marşrutu konsorsiumudur. Ölkəmizi konsorsiumda “Azərbaycan Dəmir Yolları” QSC-nin törəmə şirkəti olan “ADY Konteyner” MMC təmsil edir.
Çin-Avropa istiqamətində bu marşrutun “Orta koridor” kimi tanıdılmasında iştirakçı ölkələrin hər birinin, o cümlədən Azərbaycanın əvəzsiz rolu var. Marşrutun işləməsi üçün iştirakçı ölkələrin dövlət başçıları, aidiyyəti qurumları arasında davamlı olaraq görüşlər keçirilir, müzakirələr aparılır. Azərbaycan Respublikasının Prezidenti İlham Əliyevin Çinə səfərləri zamanı aparılan müzakirələrdə də bu məsələ daim gündəmdə olub.
Marşrutda yükdaşımaların həcminin artırılması istiqamətində atılan növbəti addım isə bu ilin aprel ayında Pekində 2-ci “Bir kəmər, bir yol” Forumunda “Azərbaycan Dəmir Yolları” QSC-nin sədri Cavid Qurbanovun iştirakı ilə “ADY Konteyner” MMC və Çinin “Xi’an Continental Bridge International Logistics Co. Ltd” şirkəti arasında Transxəzər Beynəlxalq Nəqliyyat Marşrutu ilə hərəkət edən konteyner qatarlarının təşkili üzrə əməkdaşlıq haqqında imzalanmış saziş oldu. Sazişə əsasən hər iki şirkət 2019-cu ilin sonunadək ümumilikdə 30 konteyner qatarı yola salmağı planlaşdırır ki, bu günədək 20 konteyner qatarı artıq yola salınıb.
