Cənub-Qərb Beynəlxalq Nəqliyyat Marşrutu ilə yükdaşımaların həyata keçirilməsi layihəsi çərçivəsində Slavkov (Polşa) – Astara (İran) – Slavkov (Polşa) xətti ilə hərəkət edən test konteyneri artıq Polşanın Slavkov stansiyasına çatıb. Test məqsədilə həyata keçirilən layihənin operatoru “Azərbaycan Dəmir Yolları” QSC-nin törəmə şirkəti olan “ADY Konteyner” MMC-dir.“ADY Konteyner” şirkətinin İsveçrənin “Hupac Intermodal” şirkəti ilə birgə əməkdaşlığı nəticəsində konteyner Azərbaycan və İran ərazisindən 596 km, Gürcüstandan 396 km, Qara dənizlə 1040 km, Ukrayna ərazisindən 965 km, Polşadan 399 km keçməklə ümumilikdə 3396 kilometr qət edib. Konteyner GPS sistemi ilə təchiz edilib ki, bu da marşrut boyu hərəkəti izləməyə imkan verib. Qeyd edək ki, operatoru “ADY Konteyner” şirkəti olan bu test daşıma Cənub-Qərb Beynəlxalq Nəqliyyat Marşrutunun texnologiyasının işlənilməsi, o cümlədən yüklərin çatdırılma müddətini ölçmək üçün həyata keçirilib. Test qatarının çıxış stansiyası olan Polşanın Slavkov Avroterminalı 1520mm – lik dəmir yolu xətti ilə 1435 mm-lik Avropa standartlı dəmir yolu xəttinin kəsişməsində yerləşir ki, bu da qərbi Avropa ölkələrindən yükləri bu terminalda qəbul edib və daha sonra Cənub-Qərb marşrutu üzrə daşımaq üçün imkan yaradır. Slavkov Avroterminalından (http://www.euterminal.pl/) gündəlik olaraq blok qatarlar yola düşür və “ADY Konteyner” MMC-nin konteynerləri bu blok qatara qoşulur. Blok qatarı Slavkovdan Astaraya olan məsafəni 8 günə qət edəcək. Eyni müddətdə də geri qayıdacaq.
