Bakı-Tbilisi-Qars dəmir yolu xətti ilə hərəkət edən, Türkiyədən Çinə ixrac yüklərini daşıyan ilk qatar təyinat nöqtəsi olan Sian şəhərinə çatıb.
Qatar Türkiyədən Çinin Qazaxıstanla sərhədinə rekord müddətdə – 10 gün ərzində çatıb. Belə ki, dekabrın 6-da, səhər 10.30-da Türkiyənin Köseköy stansiyasından tam yüklənərək yola çıxan qatar ayın 16-da Çinin Sincan Uyğur muxtar bölgəsindəki Xorqos quru limanına daxil olub. Bu da planlaşdırılan vaxtdan 2 sutka tez deməkdir.
Hər biri 40 futluq olmaqla ümumilikdə 42 konteynerdən ibarət və məişət texnikası daşıyan konteyner qatarı ümumilikdə 8693 kilometr yol qət edib.
Bakı-Tbilisi-Qars dəmir yolu xətti vasitəsilə, Türkiyə Dövlət Dəmir Yolları və Pasifik Eurasia Logistics şirkətinin dəstəyi ilə İstanbuldan Siana yola salınan ilk ixrac qatarının operatoru Transxəzər Beynəlxalq Nəqliyyat Konsorsiumunun üzvləri – ADY Konteyner (Azərbaycan), KTZ Express (Qazaxıstan), GR Logistics (Gürcüstan) və Pasifik Eurasia Logistics (Türkiyə) şirkətləridir. Qatar təyinat məntəqəsi olan Sian şəhərinə ümumilikdə 2 qitə, 2 dəniz və 5 ölkə keçərək çatıb.
Qeyd edək ki, hazırda Türkiyədən Çinə ikinci ixrac qatarının göndərilməsi istiqamətində növbəti sifariş daxil olub. 42 ədəd 40 futluq konteynerdən ibarət qatarın yaxın günlərdə yola salınacağı gözlənilir.
